Asteko kronika

LARUNBATA
Galizia: Xuntako Kultura sailburu Anxela Bugallok proposamen bateratu bat aurkeztu zuen Santiagoko Herri Galiziarraren Museoan, Unescok galiziera ondare ez materialtzat onar dezan. Unescok azaroaren 25ean aztertuko du proposamena.

IGANDEA

Eskozia: Herrialdeko tory-ek David Cameron babestu zuten Erresuma Batuko Alderdi Kontserbadoreko buru izateko. Edinburgoko legebiltzarreko 18 diputatu kontserbadoreetatik 12k egin zuten Cameronen alde eta bik bakarrik David Davis lehiakidearen alde.

ASTELEHENA

Gales: Erresuma Batuko Fiskaltzak esan zuen ez zuela oinarririk ikusten Tony Blair lehen ministroa galestarren aurkako adierazpenak egin izanaz akusatzeko. Downing Streeteko estratega ohi Lande Pricek bere egunerokoan argitaratu zuenez, Blairrek «Fucking Welsh» (galestar madarikatuak) esan zuen behin eta berriz 1999ko Galesko bozetan, laboristak emaitza txarrak ateratzen ari zirelarik.

ASTEARTEA

Eskozia: Edinburgoko zinegotzi Steve Cardowniek alderdi laborista utzi zuen SNP Eskoziako Alderdi Nazionaleko kide bihurtzeko. Hala, laboristek gehiengoa galdu zuten Udalean. Cardowniek azaldu zuenez, laboristek eskuinera egin dutelako utzi du alderdia.

ASTEAZKENA

Korsika: Propriano herrian (Hego Korsika) gazte bat hil zuten tiroz goizaldean, gurasoen etxean. Frantziako jendarmeen ustez, hilketa izan zen, baina ez dute baztertzen armen manipulazio okerrak eragin izan heriotza. Beste hiru gazte zeuden berarekin etxean.

OSTEGUNA

Herrialde Katalanak: «Adinaren arrazoiak» argudiatuta (72 urte) aske utzi zuten Lluis Maria Xirinacs Bartzelonako apaiz eta senatari ohia. 2002ko irailaren 11n (Diadaren eguna) «ETAren eta Herri Batasunaren laguna» zela esateagatik «terrorismoa goratzea» egotzi eta Espainiako Fiskaltzak bi urteko espetxe zigorra eskatu zuen 2004an. Asteartean atxilotu zuten.

OSTIRALA

Bretainia: Batasun Demokratiko Bretoiak (UDB) manifestazioa egin zuen Bresten, Frantziako lan agentziak (ANPE) frantsesez eta bretoiez idatziriko bi lan eskaintza argitaratzea uko egin zuela salatzeko.