Auzi medikuek 50 gorpu aurkitu dituzte beste hobi komun batean

Bosnia-Herzegovinako Kroaziar-Musulmanen Federazioko auzi medikuek beste hobi komun bat aurkitu berri dute Srebrenica hiritik gertu. 50 gorpu antzeman dituzte bertan, baina 100 ere egon daitezkeela uste dute. Ustez Srebrenicako sarraskiaren biktimenak dira hilotzak.

Srebrenican desagertutakoak bilatzeko batzordeko kide Murat Hurticek nabarmendu du bigarren mailako hobia dela, hots; bertan dauden gorpuak beste hobi batetik eraman zituztela uste dute adituek, eta hilketak estaltzeko lurperatu zituztela beste horretan. «Gorpuetako batzuk nahiko ongi mantendu dira, beste batzuk aldiz txikituta daude», adierazi du Hurticek. Gorpuen ondoan bala puskak ere aurkitu dituzte.

Ostegunean hasi ziren hobian indusketak egiten. Hamar bat egun beharko dituzte lan hori egiteko. Hobia 18 metro da luze eta hiru metro eta erdi zabal.

Hildakoen aldeko martxa gaur amaituko da

Hobia Srebrenicako sarraskiaren urteurren ekitaldiak egingo dituzten herritik, Potocaritik, hurbil dago. 50.000 lagun espero dituzte oroimen ekitaldietan; haien artean, nazioarteko hainbat agintari.

Sarraskian hil zituzten 600 musulmanen gorpuak Potocarin lurperatuko dituzte bihar bertan. Dagoeneko 1.400 lagun daude lurperatuta. Gainerako biktimak identifikatu gabe daude oraindik. Bosniako poliziek eta Europako polizia taldeko kideek estu zainduko dituzte ekitaldiak. Gaur, indar serbiarren aurka borrokatu ziren musulmanen aldeko martxa amaitzekoak dira ehunka musulman bosniar, Potocarira iristean. Gehienak duela hamar urte Srebrenicatik bizirik atera ziren herritarrak dira. Zvornik herritik gertu atera ziren martxako parte-hartzaileak, joan den ostiralean. 90 kilometro egin dituzte oinez. Heriotzaren martxa-askatasunerantz- ko bidea izena jarri diote martxari.

Bosniako indar serbiarrek musulmanen aurkako erasoak indartu zituztenean bide hori bera erabili zuten herri-tarrek erasoetatik ihes egiten saiatzeko.