Bete egin da inkestek aurreikusitakoa, eta sortu zenetik lehen aldiz gobernuan izango da eskuineko Avenir du Quebec koalizioa, 73 diputaturekin. Emaitza ofizialak argitaratu ez dituzten arren, Philippe Couillard lehen ministroa izan da hura zoriontzen lehenengoetarikoa.
Azken hamabost urteetatik hamahirutan agintean izan den Alderdi Liberalak botoen %24,31 lortu ditu, eta 32 diputatu izago ditu legebiltzarrean. "Quebeceko herritarrek aldaketarako nahia adierazi dute", onartu du Couillardek.
Independentistek hartu dute kolperik gogorrena. Inoizko emaitzarik txarrena izan du Parti Quebecoisek, botoen %17,25 bereganatuta —duela lau urte %25,3 lortu zituen—. Independentistek hamar diputatu izango dituzte, 125 eserlekuko legebiltzarrean. Ordezkari kopuru bera izango dut ezkerreko Quebec Solidaire alderdiak ere, botoen %15,72 eskuratuta —duela hiru urte baino hiru aldiz gehiago—.
