Artur Mas Kataluniako Gobernuko presidentearen, Joana Ortega presidenteordearen eta Irene Rigau Hezkuntza kontseilariaren aurkako kereilak salatzeko, "autoinkulpazio kanpaina" jarri du martxan ANC Kataluniako Biltzar Nazionalak. Goizetik, ehunka lagun bildu dira Bartzelonan, Kataluniako Auzitegi Nagusiaren aurrean. Auzitegiak tramiterako onartu zituen kereilak atzo.
Jaume Marfany ANCko presidenteordeak adierazi duenez, azaroaren 9an "1,9 milioi lagunek desobeditu zieten" Espainiako Estatuari eta haren legeei, eta "autoinkulpazioen" bidez "burujabetza ekintza hori berretsi" egiten dute gaineratu du. Marfanyren arabera, parte hartze prozesua "demokratikoa eta baketsua" izan da; hori horrela, herritarrei "autoinkulpatzeko" eskatu die: "Gure presidenteari eraso egiten diote, gure erakundeei, eta, beraz, baita guri ere".
Protestan izan dira, besteak beste, ERCko Oriol Junqueras, Anna Simo eta Gemma Calvet; CDCko Josep Rull eta CiUko Jordi Turull.
ANCko Desobedientzia Batzordeko Andreu Portak azaldu duenez, "autoinkulpazio prozesuarekin" bat egiteko beharrezkoa da ANCren webgunean eskegi duten dokumentua betetzea, eta Kataluniako Auzitegi Nagusian edo gertuen dagoen guardiako epaitegian aurkeztea.
Cap govern té dret a negar la voluntat dels ciutadans expressada a les urnes! #autoinculpacions9npic.twitter.com/g084HMglJD
— Assemblea Nacional (@assemblea) December 23, 2014Francesc Homs gobernuko bozeramaileak ere Generalitateko hiru kideren aurkako kereila salatu du. Esan duenez, ez du ezagutzen "hautetsontziak jartzeagatik" kereilak jartzen diren "herrialde demokratikorik": "Batzuek pentsatzen badute kereilak aurkeztuta Kataluniako prozesua geldituko dutela, erabat oker daude", esan du Homsek Kataluniako Gobernuaren bileraren ondoren.
