Jaume Matas PPko kide eta Balear uharteetako (Herrialde Katalanak) Gobernuko presidente ohiari sei urteko kartzela zigorra jarri dio Palmako Lurralde Auzitegiak, ustelkeria delituak leporatuta.
Palma Arena auziko lehen kasuan epaitu dute Matas (Palma, 1954). Antonio Alemany kazetariari diru publikoa eman izana egotzi diote. Epaiaren arabera, bere jarduera politikoa sustatzeko hitzaldiak idazten zizkion Alemanyk. Honek hiru urte eta bederatzi hilabeteko espetxe zigorra jaso du.
2010ean diru publikoarekin gehiegizko kostuekin eraikitako Palma Arena belodromoaren ustelkeria kasuan bederatzi delitu egotzi zizkioten: prebarikazioa, eroskeria, fondo publikoak bidegabe erabiltzea, bidegabeko jabetzea, iruzurra, influentzia trafikoa, diru zuriketa, zerga eta hauteskunde delituak. Fiskaltzak hiru milioi euroko bermea jarri zion kartzela saihesteko, eta Matasek ordaindu egin zuen.
Bi aldiz izan da Balear uharteetako lehendakari: 1996-1999 eta 2003-2007 artean. 1996tik 2007ra irletako PPko presidente izan zen, eta 2000tik 2003ra Espainiako Gobernuko Ingurumen ministro, presidente Jose Maria Aznar zela.
