Aurreko legegintzaldian egin zuen araua PPk, eta Eusko Jaurlaritzak helegitea jarri zuen lege horren aurka, Konstituzioaren kontrakoa dela argudiatuz. Auzitegiak, baina, atzera bota du helegitea, eta, ondorioz, bere aginduak betetzen ez dituen kargudunik baldin badago, hura behin-behinean kargutik kentzeko ahalmena dauka Auzitegi Konstituzionalak.
Gehiengoz hartu du erabakia Konstituzionalak; ez, ordea, aho batez. Azken sei hilabeteetan eztabaidatu dute gaia auzitegi horretako epaileek, eta bi iritzi izan dituzte mahai gainean. Adela Asua, Juan Antonio Xiol eta Fernando Valdes-Re erabakiaren kontra azaldu dira, eta, antza, helegitearen zati bat onartzearen aldekoak ziren.
Orain, legea eskuetan, Forcadell kargutik kentzeko aukera eduki dezake Konstituzionalak, haren kontrako prozedura bat martxan baitago auzitegiaren erabakiari desobedientzia egitea egotzita. Zehazki, Kataluniako Legebiltzarrean independentziarako bide orriari buruzko eztabaida egiteagatik eta bozkatzeagatik auzipetu du Kataluniako Auzitegi Nagusiak.
