Hamar urte dira Evo Morales Boliviako presidente izendatu zutenetik, eta hamarkadan zehar eginiko "iraultza baketsuaren" bilana aurkeztu du Senatuan. Datu ekonomikoei erreparatu die, eta nabarmendu 2005az geroztik Barne Produktu Gordina %5 hazi dela batez beste; 1985-2005 epean, ordea, %3,2.
Muturreko txirotasuna %17,3ra murriztu dutela ere azpimarratu du, eta gogorarazi 2005ean %38,2koa zela kopuru hori: "2006an gobernura heldu ginenean, Bolivia Hego Amerikako azken herrialdea zen, eta Amerikako azkenaurrekoa. Iaz, Hego Amerikako lehenengo eta Amerikako bigarren herrialde gisa kokatzen gaituen hazkundearekin amaitu genuen urtea".
%4,8ko hazkundea izan du Boliviako ekonomiak 2015ean; aurreko urteetan baino apalagoa, gasaren prezioek behera egin dutela-eta —hori da Boliviak esportatzen duen produktu nagusia—.
