Tel Haselen kontrola hartu du Al-Nusrak, eta, 200 zibil bahitzeaz gain, zortzi lagun hil dira borroketan. YPG Herri Kurduaren Babeserako Komitearen alde borrokan ari den Liwa Jabhat al-Akrad talde armatuko sei kide eta bi zibil dira hildakoak.
Atzo eskatu zioten YPGek "armak har ditzakeen edonori" Al-Qaedari lotutako talde armatuen kontra borroka daitezen. Azken asteetan gora egin dute istiluek Siriaren menpeko Kurdistanen, Al-Nusrak hainbat hiritan erasoak eginda.
Turkiako Gobernuak, berriz, ukatu egin du Al-Nusrari laguntza ematen ari denik. Ankarak sarritan esan du ez duela autonomiarik onartuko Siriaren menpeko Kurdistanen, baina ziurtatu du ez dela Al-Qaedari lotutako talderik babesten ari Siria iparraldean kurduen kontra borrokatzeko.
