Autonomia garatzeko eskuduntza berriak eskualdatzeaz negoziatu dute azken hemeretzi urteotan Hego Tirolgo gobernuburu Luis Durnwalderrek eta Italiako Administrazio Egituraketarako ministro Roberto Calderolik. Bolzanoko aginte autonomoak, hala, gutxira eskuratuko dituen eskuduntzen artean daude Polizia autonomikoaren sorrera etaposta zerbitzuaren aginpidetza. Haatik, eskuduntza berri horiek eta oraindik zehazteke daudenak garatzeko baliabide nagusia Fiskalitate Federalerako Legea izango da. Erreforma fiskal hori iragan irailean onartu zuen Italiako Legebiltzarrak.
Calderoli ministroarekin egindako bileran «elkarlanerako giro ona» izan dela nabarmendu du Hego Tirolgo presidenteak. Apirileko hauteskundeen ostean, eta Italian eskuineko indarren koalizioa gailendu ostean, Silvio Berlusconi da berriro ere Erromako gobernuburu. Gobernu horretako kide nagusien artean da, aldiz, Umberto Bossi buru duen eta Italia estatu federal bilakatu nahi duen Lega Norde alderdi populista. Gaur egun Erromako gobernuan agintzen dutenekin «giro ona» dagoela nabarmendu arren, Hego Tirolgo agintari autonomistek block frei jokabideari eutsi nahi diote, hots, Italian lehian dauden eskuineko eta ezkerreko blokeetatik aske geratzea.
Bozetan berriro ere garaile
Hauteskunde orokorrei begira, ez koalizio politiko baten ez bestearen alde egitea erabaki izanak mesede egin die Hego Tirolgo indar autonomistei. Jarrera horrek ekarritako onurak agerian geratu dira joan den urriaren 29an egindako boz autonomikoetako emaitzei erreparatuta. Izan ere, Hego Tirolgo Herritarren Alderdia (SVP) garaile irten da beste behin. 1972an autonomia estatutua indarrean jarri zutenetikagintean egon da SVP.Alderdi autonomista horrek botoen %48,1 bereganatu ditu. Hala ere, 2005. urteko emaitzekin alderatuta, botoen %7,5 galdu ditu. Nabarmen gora egin du, aldiz, eskuin muturreko Die Feiheitlichen Tirolgo Alderdi Nazionalistak, bozen %14,3 lortu baititu, orain dela bost urte eskuratu zituenak baino hiru bider gehiago.
Italiako alderdiak, berriz, nabarmen atzean geratu dira. Hala, Silvio Berlusconi buru duen Askatasunaren Herria koalizioak botoen %8,3 lortu ditu, ezkerreko Alderdi Demokratikoak %5,9 eta Berdeak alderdi ekologistak %5,8. Azkenik, Hego Tirolgo indar politikoen artean berrikienik eratu den STF Hego Tirolen Askatasunerako Alderdiak bozen %4,9 bereganatuditu. STFren aldarrikapen nagusia Hego Tirolek eta Ipar Tirolek (Austria) bat egiteko proposamenaren gainean herri galdeketa egitea da.
Historia gorabeheren menpe
Hego Tirol Italiaren parte bihurtu zen 1919. urtean. Ordu arte Austriako inperioaren menpe egon zen Bolzano (Bozen, alemanieraz). Anexionatze horren ostean, Hego Tirolek italieratze politika saioak jasan zituen, baina porrot egin zuten, herritarrek alemanieraz irakasteko eskola klandestinoak eratu eta sustatu baitzituzten. Alemanian naziak aginteaz jabetu zirenean Hego Tirolgo alemaniar hiztunak bakean uzteko agindu zioten Italia faxistari. 1943an, berriz,eskualdean jaun eta jabe bihurtu ziren naziak. Gisa horretako gertaerak jasan zituzten beste eskualdeetan bezala, Hego Tirolgo hainbat herritarrek ideologia eta politika naziarekin bat egin zuten.
Bigarren Mundu Gerraren amaieran, Hego Tirol berriro ere Italiaren menpeko bihurtu zen. Haatik,Italiako gobernuburu Alcide de Gasperik eta Austriako kantziller Karl Gruberrek izenpetutako hitzarmenaren haritik, Hego Tiroli «administrazio eredu berezia» onartu zion Erromak, 1946ko irailaren 5ean.
1960ko hamarkadan, BASHego Tirol Askatzeko Batzordeek borroka armatua egin zuten Hego eta Ipar Tirolen batasuna xede. Borroka horri esker lortu zuten 1972an Hego Tirolgo autonomia estatutua. Estatutu hori 1992an garatu zuten.
