igandea
Sardinia: Uharteko kostaldea salbatzeko eskaera herrikoia helarazi zioten Eskualdeko Kontseiluko presidente Renato Soruri. Amici Della Terra (Lurraren Lagunak) taldeak abiatu zuen ekimena.
astelehena
Gales: Plaid Cymru alderdi abertzaleak «bidegabe» iritzi zion Erresuma Batuak Galeserako duen idazkari Peter Hain aurrerantzean Ipar Irlandarako idazkari ere izateko Londresek hartutako erabakiari. «Bidegabea da, ez bakarrik Galesko jendearentzat, baita Irlandako iparraldeko jendearentzat ere», salatu zuen Plaid Cymruko diputatu Helen Jonesek. Hainek orain Galesen behar bezainbat denbora igaroko ez duelako ere kexu zen.
asteartea
Sardinia: Zentro-ezkerreko alderdiak (Italian egoitza nagusia dutenak) nagusitu ziren probintzietako presidentetzarako zein udal bozetan. Zortzi probintzietatik sei eskuratu zituzten, hain justu.
asteazkena
Galizia: Ferrolgo portuan Norvegiako ontzi bat itsasoratzera begira garbitzen ari zirela, lau langile hil ziren, gas isurien ondorioz. Horietako bat bere lankideak laguntzera joan zenean hil zen, besteak bezala itota. Hiriko ontzioletan bi astetan gertatzen den hirugarren lan istripua izan zen.
osteguna
Bretainia: Ezker bretoiak banatuta segitzen zuen Frantziako estatuan Europako Konstituzioaren gaineko erreferendumean hartu beharreko jarreraz. Emgann talde independentistak Itunari ezetza emateko eskatzen duen bitartean, Parti Breton autonomistak baietza galdegiten zuen.
ostirala
Galizia: IX. Jardunaldi Independentisten kariaz, Hizkuntza eta Nazio Berreraikuntza izan zituzten ardatz Galiziako, Herrialde Katalanetako eta Euskal Herriko hainbat ordezkarik, Santiagon. Primeira Linha erakunde abertzaleak antolatu zituen.
