Lerro hauek idazteko unean ez zegoen argi zenbat hildako eragin zituen Bangkokeko erdigunean zartarazitako bonba-autoak. Baina lehen informazioen arabera, gutxienez 27 dira hildakoak -tartean lau atzerritar- eta dozenaka zaurituak. Momentuz ez dago atentatua bere gain hartu duenik.
Thailandiako hiriburuko Erawan santutegian leherrarazi dute ustez motozikleta batean kolokatutako bonba. Turista ugari ibiltzen diren krimenaren eremua hiriaren erdigunean dago kokatuta. Bertako Poliziak blokeatu egin du eta ingurune hartatik urruntzeko deia luzatu du.
Lehergailu-teknikariek gutxienez beste bi bonba desaktibatu dituztela jakinarazi du Bangkok Post egunkariak bere Twitterreko kontuan, eta Poliziak lehergailu gehiagoren bila jarraitzen du.
Thailandiako Gobernuak erasoa salatu du, "Asiako herrialdearen ekonomiarekin eta turismoarekin amaitu" nahi duela argudiatuz. "Ekonomia eta turismoa suntsitu nahi dituzte, turistak ibiltzen diren eremuaren bihotzari eraso egin diotelako".
