Bushen kontrako protestak Mexikon

George Bush AEBetako presidentea egiten ari den bisitaren harira, protestak izan ziren atzo iluntzean (bart goizaldea Euskal Herrian) Mexikon, batik bat, hiriburuan. Nazioarteko albiste agentziek zabaldu dutenez, AEBen enbaxadaren atarian protestak ez ezik, istiluak ere izan dira: AEBetako banderak erre eta enbaxada harrikatu dute manifestariek, eta gasa jaurtiz erantzun diete poliziek. Zenbait iturriren arabera, enbaxada inguratzen duten segurtasuneko hesietatik bost botatzea lortu dute manifestariek. Hainbat lagun zauritu dira istiluetan (iturri ofizialen arabera, poliziak ere badira tartean), eta, halaber, hainbat lagun atxilotu dituzte.

AEBetako enbaxadaren atariko protesta horretan istiluak sortu dira, baina Mexiko hiriburuan bertan egin dira beste zenbait manifestazio batere liskarrik gabe igaro direnak.

Latinoamerikako hainbat herrialdetan zehar bidaia ofiziala egiten ari da Bush, eta haietako gehienetan protestak egin dituzte herritarrek AEBetako presidentearen kontra. Zehazki, Urugai, Brasil, Kolonbia, Guatemala eta Mexiko bisitatu ditu.