Bart gauean jakinarazi du Henrique Caprilesek onartu egin duela Venezuelako oposizioko alderdien proposamena, herrialdeko presidentea hautatzeko apirilaren 14an egingo dituzten bozetan hautagai izateko. Hortaz, Nicolas Maduro jarduneko presidentea eta Capriles lehiatuko dira bozetan.
Hauteskunde kanpainak hamar egun iraungo du, baina elkarri gauza ugari aurpegiratuz abiatu dute bozetarako bidea Madurok eta Caprilesek. "Nicolas, nik ez dizut bidea libre utziko, botoetan garaitu beharko nauzu", esan du Caprilesek; gainera, hauteskundeei begira Chavezen hilotza eta herritarren oinazea bere mesedetan erabili izana egotzi dio Madurori. Chavez "historiak" epaituko duela adierazi du, eta Madurori eskatu dio argitzeko zehazki noiz hil zen Chavez.
Madurok, berriz, "arduragabea" eta "faxista" deitu dio Caprilesi, eta "komandantearen ohorea defendatzeko ekinbide judizial guztiak" erabiliko dituela ohartarazi dio. "Aktore bat da; gaur mozorroa erori zaio, eta agerian utzi du faxista aurpegi nazkagarria. Bere helburua Venezuelako herria probokatzea da" (bideoa).
