Artur Masek emaniko lehen azalpenen arabera, ez da kasualitatea Madrilgo prentsak egunotako polizia operazioa ia hilabete lehenago iragarri izana. "Espektakulua" antolatzeko egin dela deritzo, eta CDC alderdiari kalte egiteko asmoz. Hala ere, epaileek zantzuak ikusiz gero ikerketek beren bidea egitearen alde dagoela azpimarratu du. Dena dela, Generalitatearen herri lanen kontratazio politika defendatu du.
Parlamentuan egin ditu adierazpen horiek, aste honetan legez kanpoko komisioen aferarekin lotura izaniko polizia operazioaren harira.
Hain justu, gaur goizean Daniel Osacar hartu du atxilo Guardia Zibilak, CDCko diruzain ohia. Deklarazioa hartu ostean aske utzi du epaileak, karguekin, eta pasaportea erretiratu diote. Osacar gaixo dagoelako ez zuten atxilotu herenegungo polizia operazioan; hau da, polizia etxean ahalik eta denbora gutxien igaro dezan. Dagoeneko hamabi lagun atxilotu dituzte legez kanpoko komisioen aferarekin lotuta.
