CiUk lehenengo postua lortu du Katalunian, eta PSCk beherakada handia izan du

Espainiako Kongresurako hauteskundeak lehenengo aldiz irabazi ditu CiUk Katalunian: 10 diputatu lortu zituen duela lau urte, eta 16 lortu ditu orain. Sozialisten hondoratzeak zabaldu dio lehen posturako bidea CiUri; izan ere, PSC 25 diputatu izatetik 14 izatera pasa da. Bestalde, PPk Katalunian ere gora egin du, 11 eserleku erdietsita —2008an baino 3 gehiago—. Katalunian gora egin duen beste alderdia ICV izan da, 1etik 3ra pasata. ERCek berriz, lehengo 3 diputatuei eutsi die.

Valentzian PPk irabazi du, 19 diputatutik 20ra pasata. PSOEk bigarren eutsi dio, baina 4 diputatu galdu ditu eta 10ekin geratu da. Compromis ezkerreko koalizioak diputatu bat lortu du lehen aldiz, eta baita UPDk eta ICVk ere. Balearretan, berriz, PPk 5 diputatu lortu ditu, eta PSOEk 3.