Konferentzia politikoa egin du CUPek, eta Junts Pel Si zerrendarekin eztabaidatu nahi dituen gaien inguruko azalpenak eman ditu. Artur Mas Kataluniako Gobernuko jarduneko presidentea eta Junts Pel Siren hautagaia gobernuko presidente hautatzea ahalbidetuko duen ez du argitu CUPek, baina azaldu du "eskuzabaltasunez" jokatuko duela.
Antonio Baños, Anna Gabriel, Albert Botran, Benet Salellas, Eulalia Reguant, Gabriela Serra eta Josep Manel Busqueta parlamentariek hartu dute hitza.
CUPek adierazi du jabetzen dela Junts Pel Si izan dela hauteskundeak irabazi dituen indar politikoa, eta "errepublikaren eraikuntza kolektiboaz" hitz egin nahi du CUPek zerrenda bozkatuenarekin. "Haustura, ekintza plana eta prozesu eratzailea" izango dira CUPen ardatzak negoziazio horretan.
Aldebakartasunaren garrantzia azpimarratu du, "batzen jarraitzeko" beharrarekin batera: "Batzen jarraitzen badugu, zilegitasun handiagoa izango dugu aldebakartasunean".
