Astearteko inbestidura saioan Artur Masek Kataluniako Gobernuko presidente izateko adina boto lortu gabe geratu ostean, bigarren bozketa egingo dute ostegunean Kataluniako Parlamentuan. Bigarrenean, Masek ez du gehiengo osoa beharko —68 parlamentari—, gehiengo soila baizik —baiezkoak ezezkoak baino gehiago izatea—.
Akordio baten bila, batzarra egin dute Junts Pel Si eta CUPeko ordezkariek. Aintzat hartuta Ciutadans, PSC, PP eta Catalunya Si Que Es Pot-ek 63 parlamentari dituztela, Artur Masek Junts Pel Si-ko 62 parlamentarien eta CUPeko biren babesa beharko luke, CUPeko beste zortziak abstenitzearekin batera.
Bileraren irteeran, CUPeko ordezkariek ez dute bileraren inguruko baloraziorik egin. Efe agentziak zabaldu duenez, zera proposatu die Masek: bera presidente izatea eta hiru presidenteorde izendatzea; Oriol Junqueras alor ekonomikorako, Raul Romeva nazioarteko gaietarako eta Neus Munte arlo sozialerako. CUPek gobernu "korala" proposatu zuen hauteskundeak egin eta egun batzuetara.
Goizean, Antonio Baños CUPen talde parlamentarioko buruak berriro argitu du zein izango den bere taldearen jarrera; ostegunean ez da presidenterik aukeratuko Junts Pel Si-k hautagai bera proposatzen badu.
Hirugarren bozketa bat?
Bigarren saioan ere Masek ez badu lortzen behar adina babes, hirugarren bozketa bat egin liteke. Araudiaren arabera, parlamentuak urtarrilaren 10era arteko epea luke hautagai bat proposatu eta presidente izendatzeko. Epemuga hori gaindituz gero egin beharko lituzkete berriro hauteskundeak.
