CUPek eta haren inguruko ezkerreko mugimenduek kaleko mobilizazioak indartu nahi dituzte berriro, eta Diada eguna baliatu nahi dute horretarako. Lau manifestazio eta hainbat ekitaldi antolatu dituzte irailaren 11rako, ANC Biltzar Nazional Katalanak eta Omnium Culturalek antolatutakoetatik aparte. Diada eguna "herritarroi kentzen ari zaizkigun eskubideak berreskuratzeko abiapuntua" izatea nahi dute Kataluniako Ezker Independentista osatzen duten taldeek: CUP, Endavant, Arran, COS, SEPC eta Alerta Solidaria. Gure izenean erabakitzen jarraitu ez dezaten: Herrialde Katalanetan, autodeterminazioa izango da manifestazioetako eta ekitaldietako leloa.
Mobilizazioekin aurre egin nahi diete "Espainia antidemokratikoari", baina baita "2.0 prozesismoari" ere, Mar Ampurdan Raizeko bozeramailearen esanetan. Fede gutxi dute erakundeengan. Ez Kataluniako Gobernuarengan, ez Kataluniako Parlamentuarengan: "Ez daude prest aurre egiteko eta eraginkorrak izateko, ez autodeterminazio eskubidea gauzatzeko, ezta eskubide sozialak berreskuratzeko ere". Beren iritziz, Kataluniako Parlamentua "edukiz hustuta" dago, Espainiako Konstituzioko 155. eta 135. artikuluen menpe. "Beraz", esan du Ampurdanek, "erasoaldi hori ezin da parlamentutik egin, jendeak egin behar du, langileek, herri eta hirietan". Dei egin die herri mugimenduei indarrak eta aldarrikapenak batzera, borroka guztiak batzera: autodeterminazioaren eta independentziaren aldekoak, feminista, ekologista, etxebizitza duinaren aldekoa, laneko prekarietatearen kontrakoa eta eskubide zibil eta politikoen aldekoa.
Irailaren 8an egingo dute manifestazioa Gironan, eta Diada egunean Lleidan, Bartzelonan eta Reusen. CUPek eta gainerako ezkerreko mugimenduek ez dute argitu ea beren jarraitzaileak ANCren eta Omnium Culturalen manifestazioan parte hartzera deituko dituzten.
