Debatearen harira, bi zentral nuklearretan sartu dira, seguruak ez direla salatzeko

François Hollanderen eta Nicolas Sarkozyren arteko eztabaida hasi baino ordu batzuk lehenago bi ekintzaile ekologistak zentral nuklearren aurkako bi ekintza egin zituzten, instalazio horien segurtasuna zalantzan paratzeko asmoz. Lehenbiziko ekintza Bugeyko zentralean egin zuten, ekialdean. Ekintzaile bat parapentean pasatu zen instalazioen gainetik, eta barruan lur hartu zuen. Greenpeacek aldarrikatu zuen ekintza. «Helburua presidentetzarako bi hautagaiei mezu bat helaraztea zen, nuklearren arriskua ukatzen dutelako». Parapenteko pilotua eta bertze lagun bat atxilotu zituen Poliziak. Civauxeko zentralean, berriz, Poitiersetik hurbil, Herve Couasnon ekintzailea, poeta-eskalatzailea ezizenez ezaguna, instalazioen barrenera sartu zen segurtasun neurriak gaindituz. Couasnon ere atxilotu egin zuen Poliziak.