'Dennis' urakana Floridara gerturatzen ari da, indarberrituta

Dennis urakana Floridako kostaldetik (Amerikako Estatu Batuak) hurbiltzen ari zen atzo eta gaur da hara iristekoa. Kubatik igaro eta hamar lagunen heriotza zein kalte itzelak egin ondoren nabarmen ahuldu bazen ere, orain berriz indarberritu egin da Mexikoko Golko gainean.

Floridako hegoaldeko muturrean dagoen Key Westeko uhartean jotzen zuen haize indartsuak iragartzen zuen jada atzo Dennis hurbiltzen ari zela. Gertakizunari aurrea hartzeko xedez, larrialdi egoerako neurriak indarrean jarri zituzten ostegunetik penintsulan. Floridaz gain, Mexikoko Golko bazterreko AEBetako beste estatu batzuetan ere neurriak hartu zituzten, hala nola Louisianan eta Alabaman. Alabaman, Bob Riley gobernadoreak barnealdeko lurretara gerizatzera joateko eskatu zien kostaldean bizi diren milioi erdi herritarrei. Mexikoko Golkoan zehar banatuta dauden petrolio ekoizketarako 116 plataforma ere hutsarazi zituzten agintariek.

Hildakoak eta kalteak Kubako uhartean

Ardura hartze horiek ez dira gehiegizkoak, zeren eta Dennis oso indartsua eta arriskutsua den zirimola baita. Saffir-Simpson eskalak dituen bost mailetatik laugarrena joa du dagoeneko, eta Kuban zein Haitin oso galera handiak eta biktimak ere eragin ditu orain arte.

Orduko 240 kilometroko abiadura zuten haizeekin Kuban sartu zen Dennis joan den ostiral arratsaldean. Uharteko toki batzuetan, baina, ufaldiak indartu eta orduko 296 kilometroko abiadurara iritsi ziren. Habanako agintariekaldez aurretik segurtasun neurriak hartu zituzten arren 1,5 milioi lagun etxetik aterarazi zituzten, hainbat heriotza eragin ditu urakanak. Hala, bada, Granmako probintzian zortzi lagunek bizia galdu zuten eta Santiagokoan, berriz, beste bik.

Haitiko egoera

Kubatik hurbil ere, Haitin, biktimarik ez zen falta. Atzo arte bederatzi pertsona hil eta beste 20 zauritu ziren. Horiez gain, beste 30 bat desagertuta zeuden lerrook idazterako.