Ostegunean bozkatuko du legebiltzarrak testua eta aurrera egitea espero da, bi indar independentistek gehiengoa baitute. Mozioaren bidez, iazko azaroaren 9ko haustura adierazpenari legebiltzarraren babesa adieraziko diete, eta hautetsiei eskatu diete "Espainiako Estatuaren erakunde ez demokratikoen eskariei entzungor egiteko. Gainera, gobernuari galdegin diote Espainiako Auzitegi Nazionalak haustura adierazpena ikertzeko egiten dituen prozedurei kasurik ez egiteko eta, beraz, Esquadra Mossoek haren aginduak ez betetzeko. Puntu horiek CUPek proposatu zituen, baina adostutako testuan ere jaso dituzte.
Eskariaren arabera, 60 eguneko epean plan bat aurkeztu beharko dio Kataluniako Gobernuak legebiltzarrari, zehaztuz nola gauzatuko dituen haustura adierazpenaren eranskinean jasotako neurriak. Epe hori 30 egunekoa izatea nahi zuen CUPek, baina adostutako testuan beste hilabete bateko epea eman diote gobernuari. "Prozesu eratzailearen fase aurre eratzaileari buruzko jarduera plan" bat ere aurkeztu beharko dio gobernuak legebiltzarrari; hori ere, 60 eguneko epean.
