Diktadurako Iraungitze Legea bertan behera uztea aztertzen ari dira Uruguain

Uruguaiko Diputatuen Ganberan saio berezia izan zuten atzo. Iraungitze Legea bertan behera utzi ahal izateko bozketa egitekoa zuten diputatuek; diktadura garaiko (1973-1985) krimenak auzibidean jartzeko ahalbidetuko luke horrek. Fronte Zabala alderdiak sustatu du ekimena, behin neurri hori hartuta, botere banaketa gauzatuko dela argudiatuta; izan ere, gaur egun justiziak exekutiboaren baimena behar du, legeak uzten dituen zirrikituak baliatuta, hainbat auzi ikertu ahal izateko. Alderdi Nazionala eta Colorado Alderdia proiektuaren kontra daude, baina ezkerreko koalizioak du gehiengoa. Iazko erreferendumean, berriz, ezezkoa nagusitu zen.