Enrico Letta lehen ministroaren eta bere kabinetearen dimisioa onartu du Italiako Errepublikako presidente Giorgio Napolitanok. Estatuburuak gaineratu du bilera errondari ekinen diola orain alderdi politiko guztiekin, “krisiari irtenbide eraginkorra bilatzeko”.
Napolitanok ukatu egin du Parlamentuan bozketa eginen dutenik Lettaren konfiantza galeraren inguruan, eta gaineratu du diputatuek aukera izanen dutela gertatutakoaz iritzia emateko, gobernu berria osatu ostean.
Errepublikako presidentearen oharrean azaltzen denez, Lettaren dimisioa “ezin da atzera bota”, eta PD Alderdi Demokrataren zuzendaritzak hartutako erabakiaren “ondorio zuzena” da. Atzo, Lettaren gobernua aldatzeko proposamena onartu zuen alderdiak, alde handiz.
45 minutuko bilera egin dute Napolitanok eta Lettak Quirinale jauregian. Lehen ministroak onartu du “gobernua osatzen zuen alderdi nagusiaren babesa galduta”, ezinezkoa zitzaiola karguan jarraitzea. Aurretik, laguntza eman dioten guztiei eskerrak eman dizkie sare sozialetan, eta nabarmendu du egun guztiak “azkena balira bezala” bizi izan dituela.
