EGIPTO. Dahabeko erasoak Al Kaedak egin dituela uste dute agintariek

Oraindik aztarna gehiagoren bila dabiltzan arren, herenegungo atentatuak Al Kaedaren menpeko talderen batek egin zituela uste dute agintariek. Dahab hirian kristau koptoak, musulman egiptoarrak, israeldarrak eta atzerritarrak ziren nagusiki leherketak izan zirenean. Hildakoak zenbat diren ez dago oraindik argi. Barne Ministerioak 23 zirela jakinarazi zuen atzo arratsaldean. Handik gutxira, ordea, 18 lagun hil zirela esan zuen Egiptoko Gobernuko eledunak. Zaurituak, berriz, 80tik gora dira. Tartean atzerritar ugari. Hildakoen artean ere sei atzerritar daude. Horien artean hamar urteko mutiko alemaniar bat.

Segurtasun indarrek hamar pertsona atxilotu dituzte. Horietako hiru igandean iritsi ziren Sinaiko penintsulara, eta leherketak izan eta ordu laurden inguru geroago herrialdetik ateratzen saiatu ziren dokumentu faltsuekin. Orduan atxilotu zituzten. Bestalde, ez dago oraindik argi eraso suizida izan zen edo urrunetik leherrarazitako lehergailuekin egin zuten erasoa. Ez da Sinain halako erasoak egiten dituzten lehen aldia, aurreko kasuetan beduinoekin lotu izan dituzte erasoak, eta oraingoan ere horiek zerikusia izan dutela uste du Poliziak. Ehun lagun inguru bildu ziren atzo Dahab hiriko erdigunean, atentatuak salatzeko. Egiptoko lehen ministro Ahmed Nazifek ere hartu zuen parte kontzentrazioan. «Terroristek ez dituzte mugak ezagutzen; horregatik, Egiptok haien aurkako borrokaren lehen lerroan jarraituko du», iragarri zuen. Islama ez da indarkeria eta Ez dago Jainkoa beste jainkorik irakur zitekeen manifestariek zeramatzaten karteletan. «Bakea nahi dugu, eta zer gertatu zen jakin nahi dugu, horregatik bildu gara gaur hemen», nabarmendu zuen manifestarietako batek. Nazioarteko agintariek ere salatu dituzte erasoak. Erresuma Batuko lehen ministro Tony Blairrek eta Liga Arabiarreko presidente Amr Musa izan dira horietako batzuk. AEBek, berriz, Egiptora ez joateko eskatu die estatubatuarrei.