Mohamed Mursi presidentearen kontrako estatu kolpea Al-Sisi jeneralak zuzendu zuen, eta hark utzitako lekua hartzeko bidean da Egiptoko de facto-ko agintaria; izan ere, armadak jakinarazi du Defentsa ministroari presidentetzara aurkezteko baimena ematen diola. Bezperan, Adli Mansur behin-behineko presidenteak argitu zuen ordura arteko bide orria aldatu eta presidentetzarako hauteskundeak "udaberrian" egitea erabaki duela; legebiltzarrerako bozak baino lehen, beraz. Gaur, berriz, Al-Sisi mariskal izendatzeko erabakiaren berri eman du, eta Egiptoko armadako gradurik altuena jaso eta gutxira zabaldu dute agintari militarrek Al-Sisik hautagai izateko eragozpenik ez duela.
Hosni Mubarak agintetik bota eta hiru urtera, beraz, zirkulua ixteko zorian dira Egipton. Anaia Musulmanek hauteskundeak irabazi eta Mursi Egiptoko lehen presidente demokratikoa izan ostean, berriro armada agintea eskuratzeko moduan da. Inor gutxik jartzen baitu zalantzan Al-Sisi presidentetzako hauteskundeetara aurkeztuz gero aise irabaziko duela.
