Bi alditan egin dute Egiptoko Konstituzioari buruzko erreferenduma, eta baiezkoa aise gailendu da, bigarren aldian gotorleku islamistetan egon den parte hartze handiari esker (%71): Egiptoko konstituzioari herritarren %63,8k eman diote babesa. Salbazio Nazionalerako Fronteak protestak iragarri ditu, Mohamed Mursi presidentearen kontra batu den oposizioko talde nagusiak.
Konstituzioaren zirriborroak polemika handia piztu du hasieratik. Batzorde Konstituziogilean islamistak gailendu dira —laikoek protesta gisara alde egin zuten—, eta taldea bertan behera uzteko eta berria osatzeko eskaerak nagusitu dira manifestarien artean. Presidenteak hura ez desegiteko ateratako dekretuak areagotu du giro politikoa, eta orain, konstituzio berria eskuan, legebiltzarretarako hauteskundeak egiteko prozesua jarriko dute martxan, baina herrialdea egonkortzeko beste neurri batzuk beharko dira.
