Egiptoko Junta Militarrak aitortu du Kairoko Tahrir plazan manifestarien aurka indarkeria handia erabili duela eta barkamena eskatu du gaur. Haren arabera, armadak ikerketa hasiko du, eta zaurituak artatzeko erietxe militarra jarriko du plaza hartan.
Ostiraletik gutxienez 33 lagun hil dira Egipton, bigarren protesta oldean. Konstituzio berriak armadari gehiegizko boterea emango diola salatzeko atera dira herritarrak kalera, eta militarrak gogor aritu dira haien aurka. Junta Militarraren dimisioa eskatzeko eta boterea zibilen eskuetan uzteko exijitzen dabiltza manifestariak. Hosni Mubarak-ek otsailaren 11n boterea utzi zuenetik, armada da Egiptoko organu gorena.
Asteartean zabaldu zenez, Junta Militarrak, alderdiekin akordioa lortu ostean, "salbamendu nazionalerako gobernua" eratuko du eta armadak boterea utziko du ekainaren 30erako. Ordurako egingo lituzkete legebiltzarrerako hauteskundeak. Junta Militarrak gaur esan du bozetan segurtasuna bermatuko duela.
