Egiptoko protestei sostengua agertu diete mundu zabalean

Egiptoko protestei sostengua agertzeko mobilizazio anitz izan dira hainbat herrialdetan. Hegoafrikan, Pretoria hiriburuan, Hosni Mubaraken irudiak erre dituzte manifestariek. Libanon, Alemanian eta Austrian ere manifestazioak egin dituzte Egiptoren enbaxaden aitzinean. Jerusalemen, berriz, Israelek ez die utzi Mezkiten Zabalgunera sartzen 50 urte baino gutxiagoko palestinarrei, Egiptoko protesten antzekoak sortzearen beldur. Jordanian, berriz, Anaia Musulmanek «gobernu parlamentarioa» eratzeko eskatu diote Abdala II.a erregeari. Otsailaren 1ean, Tunisiako eta Egiptoko istiluak hedatu ondotik, gobernua desegin zuen erregeak. Erreformak azkartzea nahi dute islamistek.