Egipton ustezko hamalau islamistari heriotza zigorra ezarri diete

Egiptoko justiziak ustezko hamalau ekintzaile islamistari heriotza zigorra ezarri die, iazko uztailean Sinai penintsulan Poliziaren aurkako eraso batean parte hartu zutelakoan —zazpi lagun hil ziren—. Bertze lauri bizi osorako espetxe zigorra ezarri die. Sinaiko gatazkaren inguruan auzitegiek emandako lehen epaia izan da.

Iaz Hosni Mubarak boteretik kendu zuen matxinadaz geroztik, Poliziaren eta militarren aurkako hainbat eraso egon dira Sinain. Agintariek beduinoei eta islamistei egotzi dizkiete. Israelgo armadak ere jasan ditu erasoak, eta iradoki du mugaz bestalde erantzun lezakeela. Egiptoko armadak, baina, ohartarazi du «barruko edo kanpoko» edozein erasotzaileren «eskuak moztuko» dituela.