Ehunka lagun hil dira eta milatik gora desagertu Filipinetan ekaitzarekin

Washi ekaitz tropikalak uholde larriak eragin ditu Filipinetako hegoaldean. Gurutze Gorriak aditzera emandako datuen arabera, ehunka lagun hil dira eta milatik gora desagertu, eta kopuruak gora egiten jarraituko du sorospen lanek aurrera egin heinean. Larrialdi zerbitzuek eta soldaduek teilatuetan harrapatuta geratu direnak jaso dituzte.

Milaka lagunek aterpea bilatu nahi izan dute, eta uharteko toki garaietara joaten saiatu dira; asko, baina, lo zeudela harrapatu ditu ekaitzak. Sorospen arduradunek ehunka gorpu jaso dituzte uretatik. Gainera, milaka lagun daude errepideetan geldirik, uholdeetatik ihesi joandakoek ilara luzeak sortu baitituzte. Haize gogorrek egoera okertu dute.