Hauteskundeak irabazi eta bost hilabete eskasera, joateko eskatu diote ehunka milaka brasildarrek Dilma Rousseff presidenteari. Hark gidatzen duen Langileen Alderdia ustezko ustelkeria kasu batean nahasturik dago, eta auzi horrek bultzatu du jendea manifestatzera. Izan ere, Petrobas Brasilgo petrolio enpresa publikoaren funtsak bidegabe desbideratzea egotzi diote. Horretaz gainera, krisi ekonomiko handia dute Brasilen.
Manifestazioak Brasilgo hainbat hiritan egin dira. Sao Paulokoa izan da jendetsuena; ehunka milaka batu dira protestan, hainbat hedabidek jakinarazi dutenez.
Brasilgo presidente hautatu eta berehala esan zuen Rousseffek bere agintaldian ustelkeria, ekonomia eta erreforma politikoa izango zirela bere gobernuaren lehentasunak. Baina agintaldian lehertu diren ustelkekeria auziek ez dute norabide hori hartu.
Gaur, protesta jendetsuen biharamunean, ustelkeriaren kontrako neurri zehatzak hartuko dituztela iragarri du Brasilgo Gobernuak.
