NBEk 2015erako pobrezia heren bat murriztu nahi du. Horretarako Ekialdeko Timorren ekonomiak %5 eta %7 artean hazi beharko du. Erakundearen ustez, hori posible izango da Dilik eta Camberrak iazko urtarrilean sinatu zuten akordioaren bidez. Horren arabera, Timorreko Itsasoko petrolioa eta gasa ustiatu ahal izango ditu Australiak. Irabazien %10 Camberrarentzat izango dira, eta beste %90a, berriz, Dilirentzat. NBEren arabera, nazioarteak herrialde horretan inbertitzen duenaren zati handi bat hiriburuan geratzen da. Nekazaritza eremuetara, aldiz, diruaren heren bat soilik iristen da. Ekialdeko Timorreko familien %80 nekazaritzatik bizi dira, baina Gobernuak ematen dituen laguntzen bosten bat soilik jasotzen dute. Ondorioz, herritarren %40 pobreak dira eta osasun zerbitzuak gutxi batzuen esku daude.
24 urtez Indonesiaren menpe
Ia mende laurden batez Indonesiaren menpe bizi izan dira Ekialdeko Timorreko herritarrak. 1999ko maiatzean, ordea, Indonesiak eta Portugalekazken horren kolonia izan zen Timor hitzarmen bat sinatu zuten, zeinaren arabera, timortarrek independentzia nahi zuten erabaki ahal izango zuten. Urte bereko irailean, egin zuten erreferenduma eta botoen %78 independentziaren aldekoak izan ziren. 2002ko maiatzean lortu zuten, azkenik, haien helburua.
Datua
90
Mila jaioberritik 90 urte bat bete aurretik hiltzen dira Ekialdeko Timorren. Horretaz gain, herritarren erdiek ez dute edateko urik eta bizi itxaropena 55,5 urtekoa da. Hala jakinarazi zuen atzo NBE Nazio Batuen Erakundeak. Muturreko pobrezia zen herrialde horren arazoa duela lau urte independentzia lortu zuenean, eta arazo bera du gaur egun ere.
