Ekuadorko El Comercio egunkariko hiru langile hilda aurkitu dituzte Kolonbiako hegoaldeko oihan batean. Javier Ortega, Paul Rivas eta Efrain Segarra dira; Ortegak 32 urte zituen, Rivasek 45, eta Segarrak 60.
Martxoaren 26an bahitu zituzten, Esmeraldas probintzian. Handik gutxira hil zituztela esan zuen Lenin Morenok, Ekuadorko presidenteak. Baina egunotan baieztatu du Kolonbiako Defentsa ministroak oihanean aurkitutako gorpuak hiru kazetarienak direla. Ekuadorko hainbat hiritan protestak egin dituzte azkeneko hilabeteetan, kazetarien bahiketa dela eta.
Frente Oliver Sinesterra taldea egin dute bahiketaren eta hilketen erantzule. FARCetik irtendako talde disidente bat da. Walter Patricio Arizala Guacho dute buruzagia.
Lenin Moreno Ekuadorko presidenteak zera adierazi du hilketen inguruan: "Doluz gaude, baina ez gara kikilduko. Ez dugu onartuko inor Ekuadorko herriari gezurretan aritzea".
