Urriaren 1eko erreferendumeko boz emaileen aurrean Espainiako Poliziak eta Guardia Zibilak erabilitako indarkeria eta larderia gaitzetsi du ELEN Europako Hizkuntza Berdintasunaren Aldeko Sareak. "Onartezina da halako indarkeria erabiltzea, ez du lekurik munduko inongo demokrazian, hainbat giza eskubide urratzen baititu". Urriaren 1ean indarkeria erabil izanaren erantzule direnak epaitzeko eskatu dute. "Mendebaldeko demokrazia normal batek Europako Batasuneko kide den herrialde baten boz emaileak jipoitu dituztenen erantzuleak atxilotuko" lituzkeela, "ez Europako Batasuneko balioak defendatzen dituzten gizarte zibileko liderrak". Ferran Suay ELENeko presidenteak eta Davyth Hicks ordezkari orokorrak sinatu dute oharra.
Jordi Cuixart eta Jordi Sanchez Omnium Culturaleko eta ANC Biltzar Nazional Katalaneko presidenteen atxiloketa salatu dute era berean —ELENeko kide da Omnium Cultural—. Europako Batasuneko eta Espainiako legediak urratzen dituela adierazi dute. Haiek berehala askatzea eskatu die Espainiako Gobernuari eta Europako Batasunari. Europako Batzordera eta Europako Parlamentura eramango dute gaia, Lisboako Itunaren bigaren artikulua urratu delako. Halaber, Espainiako eta Kataluniako gobernuen arteko negoziaketa prozesuan bitartekari neutralak bidaltzeko dei egin diote Europari.
Momentuz, baina, berri onik ez. Espainiako Auzitegi Nazionaleko fiskaltzak gaur bertan baztertu du haiek askatzeko defentsak egindako eskaera.
Urriaren 1ean polizia indarkeria jasan zutenei zuzendu zaie ELEN. Giza Eskubideen Europako Auzitegian eta Nazio Batuen Giza Eskubideen Batzordean salaketa jartzera gonbidatu ditu.
ANCk eta Omnium Culturalek Kataluniako demokraziaren eta eskubide zibilen alde egindako lana goraipatu du ELENek: “Milioika kataluniar era baketsuan mobilizatu dituzte urtez urte. Haien presidenteak atxilotzea Europako Batasuneko balioen aurka doa".
Espainiaren jarrera Kataluniako galdeketaren eta erabakitzeko eskubidearen aurkako "erasoaldi orokortua" izatea gaitzetsi dute. Nabarmendu dute Quebeceko galdeketak erakutsi zuela "mugimendu erregionalek" ere badutela eskubide hori, eta ez soilik koloniek.
