Elkarlanerako deia egin diote Putini NATOk eta AEBek

NATOk eta AEBek iruzur salaketak lehenbailehen argitzeko eskatu diote Errusiari, baina bai aliantza militarrak, bai nazioarteko potentzia nagusiak onartu dute Vladimir Putin izanen dela berriz ere presidente. Anders Fogh Rasmussen NATOko buruak espero du aliantzak eta Moskuk 2010ean Lisboan sinatutako elkarlana bultzatuko duela Putinek. Rasmussenek «bereziki» misilen aurkako defentsan espero du elkarlana, Errusiaren eta NATOren arteko auzi korapilatsuenean. AEBetako Estatu Departamentuak ere elkarlanerako deia egin dio Putini, «emaitzak berretsi eta kargua hartu ondoren». Hauteskunde Batzorde Zentralak «gardentasunaren» alde emandako pausoak ontzat jo ditu.