Suitzan mugatu egingo dituzte enpresa pribatuetako zuzendaritzetako kideen lansariek, herritarrek hala bozkatuta. Erreferendum bat egin dute, eta %67,9k bozkatu dute horrela egitearen alde. Onartu dute enpresetako akziodunek zehaztea zuzendaritzetako kideen soldata, eta herrialdeko 26 kantoiak azaldu dira ekimenaren alde.
Minder ekimena —Thomas Minder senatariak proposatu du neurria— "gehiegizko soldaten aurkako ekimen" gisara ere izendatu dute. 1,7 milioi herritarrek bozkatu zuten egitasmoaren alde, eta 762.000 inguruk kontra.
Orain, urtebeteko epea du Suitzako Gobernuak neurri hori zehazteko lege bat idatzi eta indarrean ezartzeko. Suitzako sozietate anonimo guztiei eta hango burtsan dauden enpresa guztiei ezarriko diete neurria. Ekimenaren arabera, akziodunek urtero erabaki beharko dute administrazio kontseiluen lansariaz.
