Marc Trevidic Frantziako epaileak atzo jakinarazi zuenez, muturreko hutuak izan ziren 1994an Juvenal Habyarimana presidentea, hutua hori ere, atentatuan hil zutenak. Atentatu horrek bi etnia horien arteko gerra abiatu zuen, eta horrekin, Ruandako genozidioa.
Bere txostenarekin Paul Kagame egungo presidentea errugabetu du epaileak, tutsien Ruandako Aberri Fronteko buru baitzen garai horretan. Izan ere, Jean-Louis Bruguiere epaileak aurretik 2006. urtean atentatuaren antolatzailetzat jo zuen Kagame. Abokatuak salatu du intentzionalitate politikoa izan zela erabaki horretan, eta gogoratu du Ruandak eta Frantziak harremanak eten zituztela Bruguiereren txostenaren ondorioz.
Trevidicek, ordea, 2008an auziari heldu eta Ruandan bertan egin du lan, misiletan aditu direnekin eta Falcon 50 hegazkinaren pilotu batekin. Ondorioztatu du Habyarimana hil zuen misila Kanombeko kanpalekutik bota zutela, muturreko hutuen bilgune.
