Rodrigo Londoño Echeverri Timochenko FARC Kolonbiako Indar Armatu Iraultzaileetako buruzagiak "garuneko istripu iskemiko" bat izan zuen igandean, eta erietxean da. Orduek aurrera egin ahala, haren egoerak "%90ean" hobera egin du, erietxeko arduradunen arabera, baina ospitalean jarraituko du.
Timochenkok berak eman du bere egoeraren berri: "Eskerrik asko nire osasunarekin arduratuta daudenei. Dena ondo doa, sendagile taldeari ere eskerrak ematen dizkiot, zaintzagatik".
Gracias a los que están pendientes de mi salud. Todo marcha bien, agradezco también al cuerpo médico por sus cuidados.
— Rodrigo Londoño (@TimoFARC) 2017(e)ko uztailak 2
Albistearen berri izan eta berehala, Kolonbiako hainbat eragilek elkartasun mezuak idatzi dituzte sare sozialetan. Ohar batean, FARCek eskertu egin ditu mezuok.
Timochenko maiatz amaieran itzuli zen Kolonbiara, bake negoziazioetan Kuban egon ondoren. 2015ean ere izan zituen osasun arazoak, eta, duela zortzi hilabete, Kuban artatu zuten, bihotzeko tratamendu bat hartzeko.
Timochenkok berak eta Juan Manuel Santos Kolonbiako presidenteak joan den astean hartu zuten parte FARCen armak emateko ekitaldian.
