Erregimeneko 25 buruzagi epaituko dituzte bihar Kairon

Hosni Mubarak presidentearen erregimeneko 25 buruzagiren aurkako epaiketa hasiko da bihar Kairoko Zigor Auzitegian. Iragan otsailaren 2an Tahrir plazako manifestarien aurkako erasoak sustatzea leporatu die Justiziak. Hilketa, hilketa saioa eta eraso eta min fisiko konponezinak egitea egotzi die. Erregimeneko hainbat goi kargudun eta Alderdi Nazional Demokratikoko kide garrantzitsuak daude akusatuen artean. Errate baterako, Fati Surur eta Safuat al Sharif parlamentuko goi eta behe ganberetako presidente ohiak eta Aisha Abdel Hadi Lan ministro ohia. Otsailaren 2ko istiluetan Mubaraken aldekoek gameluen eta zaldien gainean eraso zieten manifestariei.