Chris Huhne (56 urte) Erresuma Batuko Energia ministroak dimisioa eman du gaur, 2003ko trafikoko arau-hauste bat ezkutatzeagatik. Fiskaltzak jakinarazi du urratze horregatik auzipetu egingo dutela, eta ondoren utzi du kargua Huhnek. Hala ere, errugabea dela dio. Fiskaltzak zortzi hilabeteko ikerketa egin du.
Ministroaren emazte ohi Vicky Pryce ere auzipetu egingo dute. Biek hilaren 16an Londresko Westminster Auzitegira joan beharko dute deklaratzera. Fiskaltzaren arabera, ministro ohiak emazte izandakoari esan zion bere partez har zezala gida baimeneko puntuen galera. Hain zuzen, autoarekin legez kanpoko abiaduran zihoala harrapatu zuten politikaria, baina honek esan zuen emaztea zihoala gidari.
Alderdi Liberaleko kidea da Huhne. Iaz alderdi bereko beste kide batek utzi zuen ministro kargua: David Laws Altxorreko Ministerioko ordura arteko arduradunak. Legebiltzarkideen dieten auzi bategatik laga zuen.
