Erresuma Batuko Poliziak sekula baino kokaina gehiago atzeman du: 1,2 tona Southamptongo portuan, hogei metroko ontzi batean, krimen antolatuaren aurkako herrialdeko agentziak esan duenez.
Frantziako eta Herbehereetako poliziekin elkarlanean egin du operazioa, Ingalaterra hegoaldean, eta kokaina atzemateaz gain, sei lagun atxilotu ditu. Nazioarteko droga trafikoaren sare bateko kideak dira, Poliziaren arabera.
Aipatutako agentziak dio merkatuan 343 milioi euroko balioa lukeela 1,2 tona kokainak. Droga %90ean garbia dela esan du, eta ontziko komunetan ezkutatuta zegoela.
