Errusiako Federazioaren Kontseiluak (Senatuak) martxoaren 1ean eman zion estatuburuari Ukrainan militarki esku hartzeko baimena, behar izanez gero Errusiako herritarrak babesteko erabil zezan, "herrialde horretako egoera politiko eta soziala normalizatu arte". Orain, Ukraina hego-ekialdeko egoera negoziazio bidez baretzeko bidean dela ebatzi du Putinek, eta dekretua atzera botatzeko eskatu dio Senatuari.
Andrei Klimov Senatuko Nazioarteko Batzordeko presidenteordeak jakinarazi duenez, parlamentuko goi ganberak babestuko du Putinen asmoa, eta biharko saioan utziko du bertan behera martxoko dekretua.
