Orain bi urte galdu zuten independentzia erreferenduma Eskozian, baina egoera politikoa guztiz aldatu du 'brexit'-ak. Eskozian gehienek EB Europako Batasunean geratzearen alde egin zuten, eta, ondorioz, Erresuma Batutik ateratzeko bide berri bat ireki da. Nicola Sturgeon Eskoziako lehen ministroak bide hori jorratuko duela iragarri du: "Eskoziak aukera izango du independentziaren auzia eztabaidatzeko Erresuma Batuak EB utzi aurretik, gure herrialdearen interesak defendatzeko".
Glasgown egindako SNP Eskoziako Alderdi Nazionalistaren urteroko biltzarrean jakinarazi du neurria Sturgeonek. Agintariaren arabera, 'brexit'-aren erreferendumean EBn geratzearen alde bozkatu zuten herritarren %62ren interesak defendatzeko betebeharra du gobernuak. Theresa May Erresuma Batuko lehen ministroak EBtik ateratzeko prozesua 2017ko martxoa baino lehen hasi nahi du.
