Geert Wilders PVVko buruak eman ditu azalpenak: "Zoritxarrez, ez da posible izan ekainaren 24ko epea baino lehen Europako Legebiltzarrean beste sei alderdirekin taldea osatzea". Nolanahi ere, ziur agertu da datozen hilabeteetan nahikoa babes lortuko dituela. Ordura arte, PVVk eta Fronte Nazionalak lanean jarraituko dute Italiako Lega Nord, Flandriako Vlaams Belang eta Austriako Askatasunaren Alderdiarekin.
Talderik ez osatuta, ez inskribatuen artean izango dira FN eta PVV. Hori horrela, diru gutxiago jasoko dute, eta batzorde nahiz osoko bilkuretan denbora gutxiago izango dute hitz egiteko.
Wildersek esan du nahiago lukeela talde bat izan, "baina ez edonola". Taldea osatzeko, beharrezkoak dira, gutxienez, Europako Batasuneko zazpi estatu ezberdinetako 25 parlamentari batzea. FNk 38 legebiltzarkide lortu ditu, baina bost herrialdetakoak soilik.
