Eskuineko politikari klasikoa

Phillippe Seguin Frantziako Kontu Auzitegiko presidentea atzo hil zen, bihotzekoak jota, 66 urte zituenean. Seguin gaullista zen, kontserbadorea eta eskuineko politikari klasikoa. Jacques Chiracen eta François Mitterranden garaian ministro izan zen; Gizarte eta Lan ministroa. Batzar Nazionaleko presidente ere izan zen 1993. eta 1997. urteen artean. UMP Herritarren Batasunerako Mugimenduak gizon «zuzena» zela adierazi du; «besteen zerbitzura aritu zena». Maastrichteko Itunaren kontra egin zuen Seguinek 1992. urtean, bere alderdiak hura babesten bazuen ere.KRISTINA BERASAIN



TSUTOMU YAMAGUCHI

Bonben lekukoa

Hiroshima eta Nagasakiko bonba atomikoen lekuko izan zen Tsutomu Yamaguchi; hiru eguneko epean bota zituzten bata eta bestea -1945eko abuztuaren 6an eta 9an-, eta bera bien lekuko izan zen.«Bitan hil naiz eta bitan jaio naiz, eta historiaren zati hau kontatu beharra daukat hil baino lehen». Yamaguchi astelehenean hil zen, 93 urterekin, urdaileko minbiziz; bere historia, baina, liburu batean idatzita utzi du. Japonian 34 lagun baino ez dira izan bi bonba atomikoen lekuko zuzenak izan zirenak; Tsutomu Yamaguchi zen bizirik zegoen azkenekoa.K. B.