Espainiako Gobernuak adierazi du prest dagoela Kosovorekiko "gertutasuna" azaltzeko, betiere Europako Batasunak (EB) ez badu Kosovoren independentzia aitortzen. "Gure jarduera bateraezina Kosovoren independentzia aitortzen eta egonkortzen duen edozein adierazpen, ondorio edo baieztapenekin", esan du Jose Manuel Garcia-Margallo (PP) Espainiako Atzerri ministroak gaur Bruselan, EBko beste Atzerri ministroekin bilera egin ostean.
Serbia eta Kosovori buruzko bilera egin dute, eta gehienak prest agertu dira Serbia EBn sartzeko hautagai gisa jotzeko aste honetan bertan. Europa eta Kosovoren arteko balizko lankidetzaz ere mintzatu dira. "Beste herrialde batzuekin jarri dugun baldintza da Europak han zer egin dezakeen aztertzeak ezin duela ekarri hango independentziaren aitortza", adierazi du Garcia-Margallok.
Espainiako ministroaren arabera, "arrazoi juridiko eta politikoengatik" dago Espainiako Estatua Kosovo burujabe izatearen aurka, "ez barne mailako arrazoiengatik".
EBn Espainia eta beste lau herrialde baino ez daude Kosovoren independentziaren aurka. 27 kidek osatzen dute Europako Batasuna.
Eskoziako kasuarekin ere buruhausteak ditu Espainiak. Izan ere, duela hilabete Erresuma Batuko Atzerri Ministerioak jakinarazi zuen Espainiako agintariak kezkatuta daudela Eskoziako erreferendumarekin eta balizko independentziarekin.
