Espainiako Gobernuko Ministroen Kontseilu osteko agerraldian eman du erabakiaren berri Soraya Saenz de Santamariak: gobernuak adostu du Espainiako Auzitegi Konstituzionalean exekuzio-intzidente bat aurkeztea Kataluniako Parlamentuak independentzia erreferendum bat egiteko onartutako ebazpenaren aurka. Ebazpen hori baliogabetzeko eskatuko dio gobernuak auzitegiari.
Gainera, fiskaltzari eskatu dio azter dezala Carme Forcadell Kataluniako Parlamentuko presidenteak deliturik egin ote duen.
Saenz de Santamariak esan du ebazpena "Kataluniako Parlamentuaren pauso errepikakorra" dela eta horregatik aurkeztuko dutela exekuzio-intzidentean. Gobernuaren arabera, datorren urteko irailerako erreferendum bat antolatzera deitzen duten ebazpenak "zehazki urratzen dute Auzitegi Konstituzionalaren ebazpena". Izan ere, auzitegi horrek baliorik gabe utzi zituen Kataluniako Parlamentuko Prozesu Eratzailearen Batzordeak onartutako ondorioak.
