Euriteek eragindako tren istripu batean gutxienez 100 lagun hil dira

Gutxienez ehun lagun hil ziren atzo goizaldean India hego-ekialdeko Andhra Pradesh estatuan, tren bat errailetatik atera eta ibaira erorita. Antza, egun hauetan Indian jasaten ari diren euri-jasen ondorioz, errailak urak estaltzen zituen eta horrek eragin zuen istripua.

Salbamendu taldeek ehun lagun inguru atera zituzten uretatik, baina beste batzuk urak herrestan eraman zituen; beste asko burdin artean trabatuta geratu ziren. Ondorioz, baliteke hildakoen kopuruak gora egitea. Istripua Indian goizeko 04:30 zirenean gertatu zen eta bidaiari gehienak lo zihoazen. Indiak munduko trenbide sarerik handienetakoa du eta egunero hamahiru milioi herritarrek erabiltzen dute trena. Hala ere, azpiegitura oso kaskarrak dituzte eta urtean, batez beste, 300 tren istripu izaten dira. Orain hilabete ere hamasei lagun hil eta dozenaka zauritu ziren, Madhya Pradesh (Indiako erdialdea) estatuan jazotako beste tren ezbehar baten ondorioz. Orduko hartan trena abiadura bizkorregian zihoan eta balaztek huts egin zioten.