Greziako Bankuko presidente ohia (1985-1993) eta Europako Banku Zentraleko lehendakariorde ohia (2002-2008) izango da Greziako Gobernuko lehen ministro berria, Skai Greziako telebista kateak esan berri duenez: Lukas Papademos (Atenas, 1947). Giorgos Papandreuren lekua hark beteko du. Skaik dio Papandreuk berak eta Antoni Samaras oposizioburuak lortu dutela akordioa.
Gobernua bilduta dago eguerditik aurrera, lehen ministro berria izendatzeko asmoz. Ordubiak inguruko albisteen arabera, Papandreuk dimisioa emateko prestatzeko eskatu die ministroei.
Demokrazia Berria oposizioko alderdi nagusiak aurretik jakinarazi duenez, Papandreu ez den beste lehen ministro bat izendatu nahi dute gaur. "Gai hori lehenbailehen konpondu behar dugu. Iragarpenaren zain gaude", esan du Jiannis Mihelakis alderdiko bozeramaileak. Gobernu berrian, teknokratez gain, alderdietako ordezkariek egon behar dutela gaineratu du.
Zorraren erdia barkatzearen truke, murrizketa gehiago
Duela bi asteko akordioaren arabera, Greziari zorraren erdia barkatuko diote euroguneko herrialdeek, beste 130.000 milioi euro emango dizkiote bigarren erreskate planean, baina murrizketa gehiagoren truke: pribatizazioak, enplegu publikoa murriztu, soldaten jaitsiera, gastua gutxitu.... Eta bankuak nazionalizatu beharko lituzke.
Papandreuk akordio hori greziarren arteko erreferendumera eramareko borondatea azaldu zuen lehengo astean, baina Europaren, G20ren eta Nazioarteko Diru Funtsaren presioen ondorioz atzera egin zuen.
