Joan den astean Madrilgo Barajas aireportuan izandako hegazkin istripuan hildako 154 lagunetatik 86ren gorpuak identifikatu ahal izan dituztela jakinarazi du Espainiako Gobernuak. Bestalde, ezbeharrean zauritutako bi lagun oso larri daude, eta beste bat koma atzeraezinean sartu da.
Barne ministro Alfredo Perez Rubalcabak adierazi duenez, gorpuak identifikatzeko lanetan "uste baino zailtasun handiagoak" izaten ari dira. Halere, "ahalbait bizkorren" horiek identifikatzen saiatuko direla agindu du.
Hainbat kasutan, identifikazio lanak denbora luzez atzera daitezke, esaterako, atzerritarren kasuan edota adoptatutako haur baten kasuan. Gainera, gorpuen artean hainbat seniderenak egoteak zaildu egiten du DNA bidezko identifikatze prozesua.
Ezbeharrean hildako Jorge Sangrador Martinez bilbotarraren aldeko hileta elizkizunak aurki egingo dituzte, Bilbon. Hildako beste bi euskal herritarrenak -bi nafar- datozen egunotan egingo dituzte.
Istripuaren zergatiak ikertzen jarraitzen dute, bitartean, eta AENAko kamerek grabatutako irudien arabera, ohi eta komeni dena baino beranduago ekin zion MD82 hegazkinak aireratzeko maniobrari. Dena dela, oraindik hipotesiekin bueltaka dabiltza ikertzaileak.
Barajasko istripua
Ezbeharrean hildako 154 lagunetatik 86ren gorpuak identifikatu dituzte
Hilotzak identifikatzeko tenorean "uste baino zailtasun handiagoak" izaten ari dira, Espainiako Barne Ministerioaren hitzetan.
Iruzkinak
Ez dago iruzkinik
Ordenatu
